::::සිත් මල් යාය::::

පතනා වරම

2011-03-12T10:03:00.000-08:00

දසත සුවද විහිදවමින්
සිහිල් පිණි පොදක්
ගත දවටාගෙන
නුඹයි සැරසුවේ ගං දෑල
අලංකාරව හැමදාම
ඉතින් මල් කැකුලියේ
නෙලා මා ඔබ
පුදන්නම් අද දින
ලොව්තුරු බුදුන් අභියස
නිවන් ලබන්නට වරමක් පතන්නට...!

2010 න් 2011

2010-12-31T08:58:00.000-08:00

2010 ත් ගෙවිලා ගියාලු.ගොඩක් දේවල් පුබුදුවාට මේ අවුරුද්ද ඇතුලත පුබුදුවාට වුනානේ.පුබුදුවගේ ජීවීතේ සෑහෙන්න වෙනස් වුනා මේ අවුරුද්දක් තමයි 2010 අවුරුද්ද.සතුටු හිතෙන දේවල් වුනා,දුක හිතෙන දේවල් වුනා,මුලින් සතුටු වෙලා පස්සේ දුක හිතෙන දේවල් වුනා..මොනදේ වුනත්දැන් ඉතින් ඒ දේවල් වුනා.ඒ ජාතියෙන් මේ ජාතියෙන් මොන ජාතියෙන් වුනත් හිනා වෙලා ඒ දේට මූණ දෙන්න ඕන කියන අදහසෙයි පුබුදුවා නම් ඉන්නේ.
2010 අවුරුද්ද ඇතුලත් පුබුදුවට ගොඩක් යාලුවො හම්බුනා...ගොඩක් දෙනෙක් අදුන ගන්න පුලුවන් වුනා.ඒ අය අතර ගොඩාක් හිත හොද අය හිටියා,ඒ අතර මහම මහ නරක මිනිස්සුත් හිටියා.තව පිටින් හොද මූණ පෙන්න ගෙන ඉන්න ඒත් හිත නරක මිනිස්සු හම්බුනා.
මේ දේවල් කොහොම වුනත් පුබුදුවාට 2010 ගැන සතුටු වෙන්න පුලුවන්.ඒ වගේම මගේ වටේ ඉන්න යාලුවො ටිකටත් ස්තුති වෙන්න ඕන පුබුදුව්ට ගොඩක් දේවල් වලට උදව් පදව් කලාට.
අම්මට තාත්තට ගොඩක් ස්තුතියි හැමවෙලේම මං ගැන හොයලා බලන එක ගැන.ඒ වගේම මගේ ආදරණීය නිලූ ,මගේ ලගින් හැමතිස්සෙම ඉන්දගෙන මට උදව් කරනවට මම කොහොම ස්තුති කරන්නද?
තව මගේ යාලුවො ගොඩක් ඉන්නවා,,නම් කියලා නම් ඉවරයක් කරන්න බැරිවෙයි...මගේ රත්මලානේ ක්ලාස් එකේ යාලුවො ටික නම් මට කොහොම වත් අමතක කරන්න බැහැ.
ඒ වගේම අන්තර්ජාලය තුලදි හමුවුන යාලුවො එයාලත් මට ගොඩක් වැදගත්(වත්සලා අක්කා,හසිත අයියා(මඩ හසියා),හසී අක්කා,හසිත මලයා(පොඩ්ඩි),අශාන්,ජේඩී අයියා,හා පැටික්කි අක්කා,දිල්සහරා අක්කා)
ඒ වගේම එක කුසක නොඉපදුනත් මගේම සහෝදරයෙක් වගේ ඉන්න දිනේශ් අයියත් මම ගොඩක් ආදරෙන් මතක් කරනවා මේ වෙලාවේ.
ඔයගොල්ලො ඔක්කොම මාත් එක්ක 2011 වසර පුරාවටමත් ඉන්දීවි කියලා මම විශ්වාස කරනවා.

එහෙනම් ඔයගොල්ලො ඔක්කොටමයි ඔයාලගේ පවුල් වල ඔක්කොටමයි නිරෝගි සුව සාමය සතුට පිරුණ ලස්සනම ලස්සන සුභ නව වසරක් වේවා...!

ඔන්න පුබුදුවත් ගියාලු

2010-12-19T06:12:00.000-08:00

ඔන්න දෙසැම්බර් මාසේ 19 වෙනිදත් උදාවුනා.19 වෙනිදනේ අපේ කට්ටිය සෙට් වෙන දවස (ඔව් ඔව් SBU GET එක තමයි).ඔන්න පුබුදුවත් පාන්දරම දත කට මැදගෙන ගෙදරින් පිට වුනා SBU GET එකට.හසී ෆැමිලි එකේ පොඩිඩා(හසිත jayasuriya) මට පිටකොටුවට එන්න කියලා තිබ්බේ 8ට.වත් අක්කත් කොටුවට එනවා කියලා කිව්වට එයාට මගදි ගාල්ලේ කට්ටියක් හම්බෙලා කෙලින්ම ගිහිල්ලා ගෙට් එකට.හරිම නෝටි.පුබුදුවා නැග්ග බස් එක ඊයේ යන්න තිබ්බා ගමනක් අද යනවා වගේ වේගෙන් ගිය නිසා පුබුදුවා 7.40 ට කොටුවේ.පස්සේ මලයට කෝල් එකක් දුන්නා.

මම: ආහ් මල්ලි කොයි හරියෙද දැන් ඉන්නේ?එන්න තව කොච්චර වෙලා යයිද?
පොඩි හසියා:අයියේ මම තව පැය භාගෙන් එනවා...ස්ටේෂන් එක ගාව ඉන්න හොදේ

වැඩේ හරි මලයා එන්න තව පැය බාගයක් යනවා...දැන් ඉතින් පැය භාගයක් හිටපන්කෝ.පාරෙ යන බස් දිහා බල බල ඒවා ගණන් කලා පුබුදුවා පැය භාගෙ.හරි ඔන්න ආවා අපේ හසිත මලයා.දැන් දෙන්නා සෙට් වෙලා ආවා බස් හෝල්ට් එකට.විනාඩි පහක් යන්න වුනේ නැහැ මෙන්න එනවා අපේ ලොකු හසියයි(හසිත හේමරත්න) හසී අක්කයි (හසිකා හෙට්ටිගේ).දෙන්නවම අන්තර්ජාලය හරහා දැන හැදිනගෙන තිබ්බට අද තමයි මුලින්ම දැක්කේ.ඊට පස්සේ දෙන්න එක්ක දැම්මා පොඩි චැට් එකක්.බස් හෝල්ට් එකේ කණියා අයියයි,පොඩි කණියා,ගීතුයි හිටියා,තව confused programmer හිටියා නෝනා මහත්තයා එක්ක.

ඊට පස්සේ ඔක්කොමලා නැග්ගා 101 බස් එකකට.කණියා අයියා තමයි බස් එකට ස්පොන්ස‍්ර කරේ.ස්පොන්ස‍ර් කලාට මොකෝ අපිව කිලෝමීටරයක් විතර පයින් ඇවිද්දුවනේ.ගස් පිරිච්ච පාරකින් ගිය අපි ගුවන් ප්‍රහාර වලට සෑහෙන්න බයකින් තමයි ගියේ.පින් සිද්ද වේවා කණියා අයියගේ GPS එකට.කොහොමින් කොහොමහරි ඔන්න අපි ගියා යන්න ඕන තැනට.තුන් වෙනි තට්ටුවෙනෙ තිබ්බෙ.කස්ටියම ඇතුලටම ගිහින් හොද තැනක් බලලා වාඩි වුනා.හසී ෆැමිලි එකයි ජේ.ඩී අශානුයි(හිගන්නා) මායි ලගින් වාඩි වුනා.

ඔන්න ටිකකින් ලොකු හසියා හසී ෆැමිලි එකෙන් ඩිවෝර්ස් වෙලා මාරයියා ගාවට ගියා.

ඔන්න ටිකක් වෙලා ගිහින් මීටිම පටන්ගත්තා කාලිංග අයියා.

ටිකකින් කට්ටියටම තම තමන්ව අදුන්වලා දෙන්න කිව්වා.අදුන්වලා දුන්නට පස්සේ තමයි ගොඩක් කට්ටියව අදුනගත්තේ.ඔහොම පැය දෙක තුනක් මීටිම පැවැත්තුනා.ඔක්කොම වැඩ නියමෙට ගියා එකක් ඇරෙන්න.මොකක්ද ඒ එක?වෙන මොකක්ද ඉතින් ඇට මිදුලු ගල් ගැහෙන්න තරම් තිබ්බ සීතල මිසක්.

ඔහොම ඉන්නකොට අපේ හසිත මලයට මරු වැඩක් වුනා.ඔන්න ඒක ගැන අපේ හසිත අයියා වෙනමම පෝස්ට් එකක් ලියලා.කියවලා බලලා ඔයාලම තීරණය කරන්නකෝ.

ඔන්න දැන් 12.30 විතර මීටිම ඉවර වුනා.දැන් කට්ටියගේ කෑම වෙලාව.කාලිංග අයියා ඇතුලු පිරිස මරු කෑම වේලක් ලෑස්ති කරලා තිබ්බා.හසී ෆැමිලි එකත් එක්ක සෙට් වෙලා ලන්ච් එකත් ගත්තා.
කාලා ඉවර වුනාට පස්සේ කට්ටිය කථා බහ කරන්න පටන්ගත්තා.අන්තර්ජාලයෙන් හොදට අදුනගෙන හිටපු අයත් එක්ක ඇත්තටම කථා කලා.තව අලුත් අයව ඇදිනගත්ත.ඒ අය අතර ජීව් අයියා සමග නෝන මහත්තයා(අපි කරපු වැඩක් නිසා ජීව් අයියා ගුටි කෑවද දන්නේ නැහැ අක්කගෙන්),මාරයියා,සොදුරු සිතේ හිමිකාරිය වත් අක්කා,බ්ලොග් ගඩොල් උපාසක,ගෝල්ඩ් ෆිෂ්,පසන්,ගීතික,කුශාන් අයියා,බ්ලොගී අක්කා,කණියා,පොඩි කණියා,බනියා ඔය වගේ ගොඩක් අය හම්බ වුනා.(නම කියවුනේ නැත්තම් සමාවෙන්න)

ඊට පස්සේ කට්ටියම එලියට ඇවිත් සතුටින් විසිර ගියා,ඒ වුනාට අපි නම් විසිර ගියේ නැහැ.සෙට් එකට ගියා බේරේ වැවේ හංස බෝට්ටු පදින්න.දෙන්න දෙන්න සෙට් වෙලා බෝට්ටු රේස් එකක් යන්න තමයි අදහස.හසී අයියායි අක්කයි සෙට් වුනා.ජේ.ඩී අයියයි අශාන් එහෙමත් නැත්තම් අපේ හිගන්නායි දෙන්න සෙට් වුනා. මායි හසිත මලයයි සෙට් වුනා.ඔන්න දැන් කට්ටියම නැග්ගා බෝට්ටු වලට.

එකායි දෙකායි තුනයි කියලා පටන් ගත්තා තරගේ.අපේ වම් පැත්තෙන් ජේ.ඩීයි හිගන්නයි හිටගන පාගනවා බෝට්ටුවේ,කොච්චර පෑගිවත් දෙන්න එකතැන.අපි දකුනු පැත්ත බලද්දි මාර දුක හිතෙන කේස් එකක් දැක්ක.හසී අක්ක බෝට්ටුවෙ කැප්ටන් වෙලා.සුක්කානම් කරකවකව හසී අයියට අණ කරනවා පාගන්න කියලා.අනේ පව් හසී අයියා අක්කටත් එක්කම පාගනවා හති දමාගෙන.ඔය දෙගොල්ලො අතර මැද්දේ ඉන්න මායි මලයයි කිසි ගානක් නැතුව පාගලා තරගේ දින්නා.

තරගෙන් පස්සේ ඉතින් ටිකක් වෙලා අපි නිකන් බෝට්ටු පැද පැද හිටියා.පස්සේ බෝට්ටු පැදිල්ල නතර කරපු අපි වැවෙන් ගොඩට ආවා.ඇවිත් පැය භාගයක් විතර හතිඇරියා.දැන් 6 දෙනාම කඩයක් හොය හොය යනවා මොනවා හරි බොන්න.ඔන්න හම්බුනා කඩයක් ගියා කට්ටියම ඇතුලට,ගිහිල්ලා බිවුවා කික් කෝලා.

ඒකත් බීලා කික් එකේ කට්ටිය ගෙවල් බලා යන්න තීරණය කලා.ජේ.ඩී අයියව කැලණිය පැත්තට දැම්මා.අපි 5 දෙනා කොටුවට ආවා.ඇවිත් මලයයි හිගන්නයි අපෙන් සමුඅරන් යන්න ගියා.පස්සේ හසී අයියයි හසී අක්කයි මායි 138 බස් එකකට නැග්ග.මහරගමට වෙනකන්ම් එකට ඇවිත් තුන්දෙනා තුන් පැත්තකට විසිර ගියා.දුකකුත් හිතුනා.දවසම එකට ඉන්දලා වෙන්වෙලා යද්දී.හසී ෆැමිලි එක මට ගොඩාක් ලං වුනා.තුන් දෙනාම හරිම හිත හොදයි.හිගන්නයිත් ජේ ඩි අයියත් එහෙමයි.ඒවගේම මීටිමේදී හම්බුන ඔක්කොමලා හරිම හොදයි.මේ වගේ හිත හොද කට්ටිය ගොඩාක් මුණගස්සවන්න මීටිම සංවිධානය කරපු කාලිංග අයියා ඇතුලු පිරිසට බොහෝම ස්තුතියි!

මා වෙන කුමක් කරන්නද?

2010-11-08T08:53:00.000-08:00

වහලය දෙස බලන කල
අහස හිනහෙයි මා සමග
මද වැස්සක් වුවත් අහසින් විත්
පොල් අතු වහලය සිපගන්නා විට
උන්ගේ ආදරය ගෙයි බිම පතිත වෙද්දී
ගෙබිම ගොම මැටි ඒ හා එක්වී පාව ගොස්
තුන්කොන් ප්‍රේමයකට මුල පුරයි

ගෙයද සින්න වීමට යයි
අත ඇත්තේද මාරු කාසි කීපයයි
ඇගලන්නට ඇත්තේද දියව ගිය එක චීත්තයයි
නිසැකවම ලගදීම දිනක
මහමග සිගන්නට වෙනවා නිසැකයි

පෙරදා සැප සේ දිවි ගෙවූ අපට
කරකියා ගන්නට දෙයක් නැතිව
මෙලෙස අසරණ වන්නට සිදුවුනේ
නුබේ පියා දෙව් ලොව ගිය පසුවයි

පොඩි දෝණි බඩගිනි වී කදුලු සලන විට
කුස්සියට විත් සහල් නැලියට අත පෙවූ කල
හිස් නැලිය පතුලේ අත වදින විට
වහලයේ හිල් අතරින්
අහස දෙස බලා හූල්ලනවා හැරෙන්න
මා වෙන කුමක් කරන්නද?

මද පවන හමන නිම්නය

2010-10-27T09:34:00.000-07:00

මද පවන හමන නිම්නය අතර
සද එලිය ගලන විල් තෙර වෙතට
ඔබ මාව කැදවන්න
මල් සුවද ගෙන එන්න
ගත වෙහෙස දිය කරන
අද දවස කැප කරන
නුඔම වෙයි මගේ ලොවට
පුබුදු වූ රන් කිරණ

ඉඩෝරය නිමාකර ඉරි තැලුණ බිම තෙමා
සිහින් වැහි බිදු එක දෙක වැටෙයි
ගිම්හාන් කාලයට සමුදෙන්න
වසන්තය පිලිගන්න
තුරින් තුර එකින් එක මල් පිපෙයි

ගත වෙහෙස දුරලන්න
මද පවන ලෙස හමන
නොනවතින ගීතයට පද වැලක් අමුණන්න
ගොතන මේ මල් දමට එක මලක් අමුණන්න
අවසරයි මගේ සොදුර

ඔන්න දැන් පුබුදුවාගේ ආදරණීය ආදරවන්තිය සිත් මල් යායට ලියනවා.මම එයාට ආදරේට කියන්නේ නිලූ කියලා.මගේ කීමට තමයි එයා සිත් මල් යායට ලියන්නේ.හැකියාව තියාගෙන නොලියා ඉන්න එක අපරාදයක්නේ.මේ තමයි නිලූ මට මුලින්ම ලියලා ගෙනාව නිර්මාණේ,මම ඔයාලා ඔක්කොටම ඒක ආදරයෙන් පිලිගන්වනවා...

දිස්නා සොයුරිය ඔබට නිවන් සුව!

2010-10-24T08:48:00.000-07:00

දින සති මාස ගණනින්
රෝහල් වාට්ටුවේ සයනය මත
ජීවිතය කෙසේ හෝ රැකගන්න
මරණය සමග පොරබැදි සොයුරියේ
අවසන් මොහොත තෙක්
කදුලු බිදු නොවටා
සිනහව මුව අග
රදවාගෙන සිටි ඔබ
කාටවත් නොකියාම හොර රහසේම
මරු තුරුලේ ඔබ සැගවුනේ
අප නෙතගට කදුලු එක්කරමින්ය

පිලිකා රෝගයක් හේතුවෙන් අද දින ජීවිතයෙන් සමුගත් දිස්නා සොයුරියේ ඔබට මතු කෙදිනකවත් මෙවන් අකල් මරණයක් නොවේවා...ඔබට නිවන් සුව ලැබේවා!

මේ ජීවනයේ

2010-10-22T03:45:00.000-07:00

කොහොමද කට්ට්යට?ඔක්කොමලා හොදින් කියලා හිතනවා.අද පෝයනේ ඉතින් පුබුදුවා අද දවසම ගෙදර,ජීවිතේ ගෙවපු විදිහ ටිකක් වෙනස් වුන නිසා දවස් 20 කින් විතර අද තමයි දවසම ගෙදර ඉන්නේ,ඒ ඉන්න දවසෙත් මම පෝස්ට් එකක් දැම්මේ නැත්තම් මම වැරදියිනේ.අද මම ලියන්න හිතුවේ මම ඊයේ බස් එකේ එනකොට ඇහුන සින්දුවක් ගැන.අම්මා ගැන කියවෙන ගීතයක් ඒක.ගොඩක් කට්ටිය අහලත් ඇති.ඒත් අපි ඔක්කොමලාම අම්මාට ආදරෙයිනේ ඒ නිසා මම මේ සින්දුව ගැන ලියන්නම්.

එච්.ආර්.ජෝතිපාල මහත්මයාගේ ගායනා කරන මේ ජීවනයේ ගීතයෙන් දරුවකුට අම්මාගෙන් ලැබෙන ආදරය ගැන කියවෙනවා.හිතලා බලන්න අපේ අම්මලා අපිට කොච්චර ආදරේද?ඒ ආදරේ අපිට දීලා අපෙන් මොනවද බලාපොරොත්තු වෙන්නේ,මුකුත් නැහැනේද?ඒ ආදරේ හදවත පත්ලෙන්ම එන අමිල ආදරයක්.එක එලවළුවකුයි බතුයි හදපු දවසට ඒ කෑම කොච්චර රස නැති වුනත් අම්මට කියලා කවාගත්තම කොච්චර රසද?ඒ අත්දැකීම ඔයාලාත් ලබලා ඇති.ආදරෙත් බත් පතට එකතු කරලා කවන නිසයි එහෙම වෙනවා ඇත්තේ.මේ සින්දුව ඔයාලත් අහලා බලන්න ඒක කොච්චරට හදවතට දැනෙනවද කියලා...

මේ ජීවනයේ මුලු සංසාරේ//
උදාරයි...උදාරයි...උදාරයි ආදරේ
මහද ගිලෙන්නේ පෙම් සිලිලාරේ//
උදාරයි...උදාරයි...උදාරයි ආදරේ
මේ ජීවනයේ

දෑත දෑත බැද ඈ ලංවී
මට පෑව ආදරේ//
සනසාලු ලාලන කාලේ
දිවිතෙක්ම සිහි කෙරේ
ඒ නිල් දෑසේ බැල්මෙන් කැල්මෙන්
මා යන ගමනට දිරි දෙයි
මේ ජීවනයේ මුලු සංසාරේ...මේ ජීවනයේ

සුවද හදු දුනි සතපාලා
යහනාවේ මා හොවා//
පින්සාර ඇයගේ තුරුලේ
සැනසේ රජුන් පවා
ඒ දරුවකුගේ පණ වැනි උත්තම
අම්මාගේ ආදරයයි

මේ ජීවනයේ...

සින්දුව මෙතනින් ගන්න

මේ ගීතය එච්.ආර් ජෝතිපාල මහත්මයාගේ වුනත් මම you tube එකේ බලනකොට මිල්ටන් පෙරේරා මහතාත් මේ ගීතය ගායනා කරලා තියෙන බව දකින්න ලැබුනා.ඔයාලා කැමතිනම් ඒකත් බලන්න.

හොද දෙයක්...

2010-10-13T09:54:00.000-07:00

කොහොමද ඉතින් කට්ටියට,පුබුදුවාට නම් හරිම සතුටු දවසක් තමයි අද,මීට අවුරුදු 20 කට කලින් අද වගේ දවසක තමයි මේ පිස්සු කොලුවා මේ ලෝකෙට අඩිය තිබ්බේ. අවුරුදු 20 ගෙවුනා දැනුනේ වත් නැහැ.ගොඩක් දේවල් සිද්ද වුනා මේ කාලේ අතරතුර.මොනදේ වුනත් හිත සතුටින් ඉන්න තමයි පුබුදුවා උත්සාහ කරන්නේ.හරි හරි මේ දේවල් වැඩක් නැහැනේ,හොද දෙයක් කියලා පෝස්ට් එක ලියන්න ගත්ත හේතුව දැන් කියන්නම්.අද මගේ උපන් දිනේ දවසේ මම තීරණය කලා මස් මාලු කන එකෙන් අයින් වෙන්න.කොහොමත් මම කලිනුත් ඒවා පස්සේ පන්න පන්න ගිය කෙනෙක් නෙමෙයි.

මෙහෙම තීරණයක් ගන්න මට හිතුනේ උදේට ටීවි එකේ යන බණක් අහලා.මෙන්න මේ දේ තමයි මට ඇහුනේ

" මනුස්ස ජීවිතයක් ලබාගන්න කොච්චර අමාරුද?,කොච්චර වෙර වීරිය දරලද මනුස්ස ජීවිතයක් ලබාගන්නේ.මිනිසා කියන්නේ මනසින් උසස් කියන එකනේ,මේ තරම් මහන්සි වෙලා මනුස්ස ජීවිතයක් අපි ලබාගෙන මනසින් උසස් නැති සතුන් වගේ මලකුනු කන්නේ ඇයි?"

කල්පනා කරලා බැලුවම මේ කතාවෙ ලොකූ හරයක් තියෙනවා.ඒත් එක්කම සතෙක් මැරනකොට ඒ වෙලාවේ ඇති වෙන ආවේගයට ඒ සතාගේ ඇගේ මිනිසාට අහිතකර රසායනික දේවල් නිපදවෙනවා.මීට වඩා හොද නැද්ද ගහක වැලක හැදුන එලවලුවක් කන එක.

මේ පහල තියෙන්නේ මම youtube එකෙන් හොයාගත්ත වීඩියෝ ක්ලිප් දෙකක්.මේවා බලලා ඔයාලම තීරණය කරන්න ඔයාලත් දිගටම මස් කනවද කියලා?

මගේ උපන් දිනේට සුභ පතපු ඔක්කොටම බොහොම ස්තුතියි!!!!!

මරණය පෙනි පෙනී ජීවිතය ගැන පාඩමක් ඉගැන්නු අපුරැ විද්වතානෝ....

2010-10-07T08:27:00.000-07:00

අද මම ලියන්න යන්නේ මගේ ගුරුතුමෙක් මට අද පෙන්නපු වීඩියෝ එකක් ගැන.මේ වීඩියෝ එක එක්තරා විද්වතකුගේ දේශනයක් පිලිබදවයි.මේ දේශනය පවත්වන විද්වතාගේ නම Randy Pausch.එතුමා Carnegie Mellon විශ්ව විද‍‍්‍යාලයේ මහාචාර්යවරයෙක්.එතුමා මොලයේ පිලිකාවකින් පෙලෙන්නෙක්.එතුමාගේ අසනිප තත්වය එන්න එන්නම වැඩි වූ නිසා වෛද්‍යවරු ඔහුට වැඩිකල් ජීවත් විය නොහැකි බව පැවසීය.
තමන් මියදෙන්නට ලග හෙයින් ඔහු තම අවසන් දේශනය achieving your childhood dreams යන මාතෘකාව යටතේ තම විශ්ව විද‍‍්‍යාලයේ ශිෂ්‍යයන් ඉදිරියේ පැවැත්විය.නමුත් පසුව විශේෂ ඉල්ලිමක් නිසා oprah නම් රෑපවාහිනී වැඩසටහනට නැවතත් ඉදිරිපත් කලේය.පහලින් දැක්වෙන්නේ ඒ කරන ලද දේශනයේ කොටසක්.තමා මියෙන දිනය ලග ලග පැමිනෙන බව දැන දැනත් ඔහු ජීවිතය ගැන දේශනයක් පැවැත්වීය.
මේ දේශනය අසා අවසාන වූ විට මාගේ දැසටද කදුලක් නැගුනි.ස්නායු උත්තේජනය වී මුලු ඇගම හිරිවැටුනි.මේ කතාවේ මගේ හිත ගත් තැනක් නම් ඔබ අතින් වරදක් සිදුවුනා නම්,පියවර 3 අනුගමනය කලයුතුය යන්නයි.

1.සමාවන්න යැයි පැවසීම

2.ඒ වැරැද්දට වග කිව යුත්තේ තමන් බව පැවසීම

3.ඒ වැරැද්ද හරිගස්සවා ගැනීමට කලයුත්තේ මොනවාදැයි ඇසීම

මෙතුමාගේ මේ කතාවෙන් අපේ ජීවිතයට ගත හැකිදේ බොහෝය.ඒවා අපේ ජීවිතයට උකහා ගතහොත් අපේ ජීවිතද සාර්ථක කර ගත හැක.මේ වීඩියෝව දකින්නට සැලැස්වූ ගුරුතුමාටද මා මේ අවස්ථාවේ ස්තුතියි ව්න්නෙමි.නමුත් මේ අපූරු මිනිසා දැන් මරු තුරුලට වැදී අවසන්ය.මාගේ මේ ලියමන එතුමාට උත්තමාචාරයක් වේවා!අපි සැවොම එකතු වී ඔහුට නිවන් සුව පතමු!

මගේ හීනේ

2010-10-03T09:03:00.000-07:00

පුබුදුවාගේ හිත ගිහිල්ලාලු මේ දවස් වල කෙනෙක්ට
ටිකක් ආඩම්බර පිටරටක ඉපදුන කෙනෙක්ලු
මේ දවස්වල මම එයා ගැන ගොඩක් හීන මවනවා
හීන මැවිල්ල කොච්චරද කිව්වොත්
වැරදිලා දවල්ට නිදාගත්තත් පේන්නේ එයාව
ඒත් එයා ගොඩක් කලුයිලු
ඒ වුනාට මගේ හිත දැන් එයාට ගිහින් ඉවරයි
කලු උනත් දිලිසි දිලිසි ඉන්න එයා
දැක්කාම හිත යන්නේ නැත්තේ කාටද?
එයා මගේ ලගට ගත්තොත් මට ගොඩක් උදවු වේවි
ඒ නිසා එයාව ලං කරගන්න පුලුවන් උනොත්
එයා මගේ ලග ගොඩක් වෙලාවට හිටීවි
ඒත් සල්ලි එයාව මගෙන් ඇත් කරනවා
ඒත් මම එයාව කොහොම හරි
මගේ කරගන්නවා කර ගන්නවාමයි!

::::
::::
::::
::::
::::
::::
::::
::::
::::
::::
::::
::::
::::::::::::::::::
::::::::::::::::
::::::::::::::
::::::::::::
:::::::::
::::::
::::
:::
::
:
:

හෝව් හෝව් මොනවද මේ ඔයාලා හිතන්නේ???
ඕකනේ කියන්නේ ඉතින් වැරදියමයි හිතන්නේ
මම මේ කතා කලේ මගේ හිත ගියපු ලැප්ටොප් එක ගැන

පිලිම නෙලා නැති විරුවන

2010-09-23T02:15:00.002-07:00

ඔවුන් සටන් වැදුනේ ධනය,බලය සදහා නොවේ,ඔවුන් සටන් වැදුනේ නිදහස උදෙසාය.සුර සැප විදීමට හැකියාව තිබියදී රට වෙනනුවෙන් සටන් කලේ ඔවුන්ගේ හිතේ තිබූ ජාතිමාමක භාවය නිසයි.මේ විරුවනට මරණය උරුම උනේද ඔවුනගේ දේශප්‍රේමී බව නිසාය.එලෙස මියදුනු සියලු විරුවනට මේ ගීතය උපහාරයක් වේවා!!

පිලිම නෙලා නැති විරුවන් පිරිසක්
සැමරුම් දින නැති විරුවන් පිරිසක්
සැතපෙන බව පස් කදු යට රහසේ
මිහිකත කම්පා වී පුපුරා දෙස්දේවී

පීඩිත භාවය හිස පාගන විට
සමාදි සුවයෙන් නොසිටිය යුතු වග
කියාදෙමින් ඒ විරුවන් මියදුනි
උන්ගේ රුවවත් අප නෙත නොගැටුනි

පිලිම නෙලා නැති විරුවන් පිරිසක්
සැමරුම් දින නැති විරුවන් පිරිසක්
සැතපෙන බව පස් කදු යට රහසේ
මිහිකත කම්පා වී පුපුරා දෙස්දේවී

මිල මුදලට යස ඉසුරට ලොබ බැද
අවි ගැටුවේ නැත උන් රණ බිම මැද
භීෂණ දූෂණ රජවූ දෙරණක
සුභ සෙත සලකා මලෝය උන් සැම

පිලිම නෙලා නැති විරුවන් පිරිසක්
සැමරුම් දින නැති විරුවන් පිරිසක්
සැතපෙන බව පස් කදු යට රහසේ
මිහිකත කම්පා වී පුපුරා දෙස්දේවී

ගායනය:විශාරද නන්දා මාලිනී මහත්මිය

ගීතය මෙතනින් ලබාගන්න

පෙර සසරෙහි පින් කල මද බැවින්

2010-09-22T03:59:00.000-07:00

ලොවෙහි අනියත බව
නුවනින් වටහාගෙන
සන්සුන් සිතින්
කසාවතක් දරාගෙන
ලොවම ගිලෙන
අන්ධකාරයට
බුදුබණ පදයක් දෙසමින්
පහන් එලියක්ව
දැල්වෙන්න
කල පින් මදි කමට
පෙර ආත්මයෙහි
සැනසෙමි අසා
ඔබෙන් බුදුබණ
මතු භවයෙහිවත්
වන්නට ඔබ මෙන්

අසුරු සැණින් දුටු මොහොතකදී

2010-09-21T06:05:00.000-07:00

කොහොමද ඔයාලට?අදත් හදවතට දැනිච්ච සින්දුවක් අරගනයි මම ආවේ.මේ සින්දුව මට අහන්න ලැබුනේ මම බස් එකේ යද්දී.බස් එකේ තිබුන වෑර්ලස් එකෙන් නම් නෙමෙයි මේක ඇහුනේ.බස් එකට නැගලා සින්දුවක් කියලා එදා වේල පිරිමහගන්න අහිංසක මනුස්සයෙකුගෙන් තමයි මට මේක අහන්න ලැබුනේ.හිතට දැනුනා හොදටම මට නම් මේ සින්දුව.ගෙදර ආපු ගමන් ජාලේ පැත්තේ ඇව්ත් හොයලා බැලුවා,ඒත් මට හොයා ගන්න හම්බුනේ නැහැ.අන්තිමට මට මතක් වුනා අපේ වැම්පයර් අයියා ගාව පරණ සින්දු තියෙනවා නේද කියලා,දැම්මා වැම්පා අයියාගේ පෝස්ට් එකට කමෙන්ට් එකක් සින්දුව ඉල්ලලා,ඉල්ලුව පරක්කුව විතරයි සින්දුව හම්බුනා,වැම්පයර් අයියාට බොහෝම ස්තුතියි සින්දුව දුන්නට.ඔයාලත් අහලා බලන්නකෝ සින්දුව කොච්චර හිතට දැනෙනවද කියලා!

අසුරු සැනින් එක මොහොතකදී
කාලය නැවති යලි ඇර බී
විශ්වය අලුතින් බිහිවේවා
ඔබේම වී මා මගේම වී ඔබ
අපේම වී අප ඉපදේවා

යෙහෙලියන්ගේ ඉගි දිනක සැබෑ වී
ඔබේම කුලගෙයි පතිනිය වන්නට//
මතුයම් දවසක හැකිවේවා
ඔබේම වී මා මගේම වී ඔබ
අපේම වී අප ඉපදේවා

අසුරු සැනින් එක මොහොතකදී
කාලය නැවති යලි ඇර බී
විශ්වය අලුතින් බිහිවේවා
ඔබේම වී මා මගේම වී ඔබ
අපේම වී අප ඉපදේවා

සෙනෙහෙ විමානේ කිරුල දරනදා
සිඟිති තොලක කිරි සිනා දකින්නට//
එක සෙවනකදී හමුවේවා
ඔබේම වී මා මගේම වී ඔබ
අපේම වී අප ඉපදේවා

අසුරු සැනින් එක මොහොතකදී
කාලය නැවති යලි ඇර බී
විශ්වය අලුතින් බිහිවේවා
ඔබේම වී මා මගේම වී ඔබ
අපේම වී අප ඉපදේවා

ගායනය=යමුනා විනෝදනී මහත්මිය
පද රචනය=කුසුම් පීරිස් මහත්මිය
සංගීතය=ලෙස්ලි අශෝකා මයා

::සින්දුව මෙතනින් ගන්න::

සොදුරු සිතට සුභ පැතුම්

2010-09-18T04:56:00.001-07:00

බ්ලොග් අවකාශයේදී මට ඉතාමත් හිත හොද ලස්සණ මිනිසුන් මුණගැසී තියෙනවා.සොදුරු සිතේ හිමිකාරිය වන වත්සලා අක්කත් ඒ අතර ඉන්නේ ඇයගේ සිත සැබවින්ම සොදුරු නිසාය.අද දින ඇයට සුවිශේෂි දිනයකි.මන්දයත් ඇයගේ ලස්සණ සිතුවිලි වලින් පිරුන ඇයගේ බ්ලොගයට(සොදුරු සිත beautiful mind) වසරක් සපිරීම නිසයි.

අක්කේ මම අක්කට හදවතින්ම සුභ පතනවා සොදුරු සිතට වසරක් සපිරීමට!!!!!!!!!
ඒවගේම ඉස්සරහටත් හැමදාම වගේ ලස්සණ හිතට දැනෙන ලිපි ලියන්නට ශක්තිය ලැබේවා!
ඒවගේම අක්කගේ ලස්සණ හිතේ තියෙන බලාපොරොත්තු සියල්ල එලෙසින්ම ඉෂ්ඨ වේවා!

මේ ගැන මතක් කරපු හසිත අයියටත් බොහොම ස්තුතියි

සොදුරු ආදරය

2010-09-16T07:50:00.000-07:00

කෙදිනක හෝ ඔබට හුදකලා වීමට
සිදුවුවහොත් එයට ආදරය කරන්න
එවිට එය ජීවිතයේ පරමානන්දය මිස
තවදුරටත් එය හුදෙකලාවක් නොවනු ඇත

සිනහව දුරස්ව යන්නේත්
සුසුම් රැල් පාව එන්නෙත්
කදුලු රැලි ගලන්නෙත්
ආදරය සොදුරු නිසාමය

හමුවීමක ඇත වෙන්වීමක සේයා
වෙන්වීමක ඇත හමුවීමක සේයා
අප හද රැදි ආදර චායා
නිති කල හැම විට ලගම රැදේවා

I Will Love You Always. And Miss You Forever.
Love You Ever And Forever

වරද කාගේද?

2010-09-12T13:48:00.000-07:00

කිරි සුවද පුරවාගෙන මවු කුසින් විත් ලෝකය දකින
කිරි කැටි මෙලෙක් ලදරුවාගේ සිත කොයිතරම් පිරිසිදුද?
නමුදු කාලය කෙමන් ගතවෙද්දී දෑතේ නැලවුන පොඩි දරුවා
පොලවේ පයගසා ඇවිද යන ශක්තිවන්තයකු වී ඇත
දැන් මේ ශක්තිවන්තයාගේ සිතෙහි
හොද පුද්ගලයකු ජීවත් වීමට ඉඩ ඇත
තවද හොරෙකු,සල්ලාලයකු,බේබද්දකු ජීවත් වීමටද ඉඩ ඇත
උපදුන දා කිරි සුවදින් සුවද වු පුංචි සිත
හොද මිනිසකු වීමටත් නරක මිනිසකු වීමටත්
හේතුව කිමයි බැලූ කල
වරද දෙමාපියන්ගෙද නැතිනම් සමාජයේදැයි
සිතා ගත නොහැකි විය

සින්දු කැල්ලක්

2010-09-09T11:52:00.000-07:00

ඔන්න අද පෝස්ට් එකෙන් නම් මම කියන්න හදන්නේ ඉස්සර මම අහපු දැනුත් අහන ඉන්ගිරීසි සින්දුවක් ගැනයි.ඔයාලා නම් කැමතිවෙයිද දන්නේ නැහැ.ඒත් ලස්සණ දෙයක් බෙදාගන්න කැමති නිසයි මේ පෝස්ට් එක ලිවුවේ.Nelly Furtado කියන ගායිකාව තමයි මේ සින්දුව කියන්නේ.මේකේ මම ආසම ටික තමයි ඔය තියෙන්නේ

Cuz this life is too short to live it just for you
But when you feel so powerless what are you gonna do

මම හිතනවා ඔයාලත් මේ සින්දුව රස විදීවි කියලා.MP3 එක ඩවුන්ලෝඩ් කරගන්න ලින්ක් එකකුත් දාන්නම්කෝ
මේ තියෙන්නේ සින්දුවේ පද මාලාව

Paint my face in your magazines
Make it look whiter than it seems
Paint me over with your dreams
Shove away my ethnicity
Burn every notion that I may have a flame inside to fight
And say just what is on my mind
Without offending your might

Cuz this life is too short to live it just for you
But when you feel so powerless what are you gonna do
So say what you want
Say what you want

I saw her face outside today
Weatherworn, looking all the rage
They took her passion and her gaze and made a poster
Now it¡¦s moccasins we sport
We take the culture and contort
Perhaps only to distort what we are hiding

Cuz this life is too short to live it just for you
But when you feel so powerless what are you gonna do
But say what you want
Say what you want

Hey you, the one outside, are you ever gonna get in, get in
Hey you, the one that don¡¦t fit in, how ya, how ya gonna get in
Hey you, the one outside, are you ever gonna get in with your
Broken teeth, broken jaw, broken mojo
Yeah, this life is too short to live it just for you
But when you feel so powerless, what are you gonna do

Cuz this life is too short to live it just for you
But when you feel so powerless, what are you gonna do

::සින්දුව ඩවුන්ලෝඩ් කරගන්න කැමති අය මෙතනින් ගන්න::

මහමග ජීවිතය

2010-09-08T21:09:00.000-07:00

පිලිසරණක් නොමැති
මහමග ඇවිදයන
අන්ත අසරණ මේ ජීවිතයට
සරණ නුඔයි දෙවියනේ

මාපිය උරුමයක් නොමැතිව
බිහිවූ පවට මේ ලෝකයට
මහමගයි සරණ වූයේ
බඩගින්න නිවාගන්න

වරදක් වේනම් මගෙන් ඔබ හට
සමාවෙනු කරුණාකර
මමත් දරුවෙකි වෙරදරන
තව එක් දිනක් ගෙවාගන්න

සමාවෙන්න ඕන කරුණාකරලා කමෙන්ට් මොඩරේශන් දැම්මට.ඔයාලා දන්නවනේ ප්‍රශ්ණේ මොකක්ද කියලා(HERO).ඒවගේ වචන බ්ලොගයේ තියෙනවාට අකමැති නිසයි එහෙම කලේ.අපහසුතාවක් වුනොත් සමාවෙන්න.

මුහුණු පොතේ ප්‍රාර්තනා

2010-09-03T10:24:00.000-07:00

අපි හැමෝම රෑට මුහුණු පොතේ කාලය ගතකරනවා නේද?කට්ටිය එක්කලා ආදරෙන් ලෙන්ගතුකමින් chat කරලා නිදිමත ඇවිත් යන්න ලං වෙද්දි chat කරපු ඔක්කොටම

මම යනවා

bye bye

gnit,swt drmz

tc,bs කියනවා නේද?

මේ පල්ලෙහා තියෙන්නේ මට මම අදුනන අක්ක කෙනක් මුහුනු පොතේ chat කරලා යන්න හදද්දි එවපු ලස්සන ප්‍රාර්තනාවන් ටිකක්.කියවලා බලන්න gnit,swt drmz,tc,bs කියනවට වඩා කොච්චර වටිනවද නේද?මෙහෙම ප්‍රාර්තනයක්,හිතට කොච්චර දැනෙනවද?බොහොම ස්තුතියි අක්කේ ඔයාගේ ලස්සණ ප්‍රාර්තනාවට!!!!

මලක් වගේ හැමදාටම පිපීයන්

හෙටත් ඉතින් මේ පැත්තට එබියන්

බුදුසරණින් රැකවරණය සැදියන්

රැයත් නුඹට සුබ සිහිනම පෙනීයන්

අහිංසකාවියකගේ ඉරණම

2010-09-01T09:24:00.000-07:00

ඇය නමින් රුවිනි විය.ඇය කුඩා කල සිටම මාගේ හොද යෙහෙලියකි.පදිංචිය මාගේ නිවසට කිලෝමීටර 2 ක පමණ දුරින්ය.ඇය පාසල් ගියෙ කොළඔ ප්‍රසිද්ධ බාලිකා පාසලකටය.විද්‍යා අංශයෙන් උසස් පෙල ලිවීමට ඇය සුදානම් විය.එම මා ද විද්‍යා අංශයෙන් උසස් පෙල සදාරමින් සිටි නිසා ඇය මා ගියා උපකාරක පංති සියල්ලටම සහභාගි විය.ඇය ඉතා දීප්තිමත් ශිෂ්‍යාවක් විය.කාලය එසේ ගෙවෙමින් යද්දි ඇයගේ පංති වලට සහභාගී වීම එන්න එන්නම අඩාල විය.මෙය ප්‍රෙහේලිකාවක් වු හෙයින් මම ඇගේ නිවසට ගොස් බැලුවෙමි.අමාරුවෙන් ඇවිද ආ ඇය මට අසුනක් පිලිගැන්වුයේ සිනාහවකින් සංග්‍රහ කරමින්ය.ඉන් පසු මම ඇයගෙන් පංති නොපැමිනෙන්නේ ඇයිදැයි ඇසීමි.ඉන් පසු ඇය පැවසුවෙ බඩේ කැක්කුමක් නිතරම වගේ ඇතිවෙන නිසා පංති හරියාකාරව ඒමට නොහැකි වු බවයි.අතපසු වු පාඩම් වැඩ සහිත පොත් ටික ඇයට දි මම ඇයගෙන් සමුගෙන නිවස කරා ඇදුනෙමි.

ඉන්පසු පංති පැවති දිනයේ ඇය පංති ආවේය.නමුත් ඉන් පසු දිගටම ඇය පංති පැමිණියේ නැත.නැවත මම ඇයගේ නිවසට ගියෙමි.නිවස ඉදිරිපිට සිටියේ මලානික මුහුණින් පාර දෙස බලා සිටි ඇයගේ මවය.මම ඇයගෙන් රුවිනි ගැන තතු විමසා සිටියෙමි.එකනෙහිම ඇයගේ දෑසින් කදුලු කැට කඩාවැටෙන්නට විය.ඒත් සමගම ඇය පවසා සිටියේ රුවිනිගෙ බඩේ අමාරුවා උග්‍ර වී ඇයව කලුබෝවිල ඉස්පිරිතාලයේ නැවතු බවය.පසු දින මම මගේ මවද සමඟ ඇය බැලිමට ඉස්පිරිතාලයට ගියේය.ඇය ඉතා අමාරුවන් පසු වන බව මට වැටහිය.වචන 2,3 කට වඩා මම ඇය සමග කතා නොකලෙමි.එතනින් සමුගත් අපි නිවස බලා පැමිනියෙමු.
දවස් 3 කට පසු තවත් නරක ආරංචියක් කන වැකුනි.එනම් ඇයගේ රෝග තත්වය තීරණය කරගත නොහැකි වූ බැවින් ඇයම මහරගම පිලිකා රෝහලට මාරු කල බවය.

පසු දිනම මම මව සමග ඇයව බැලිමට මහරගම පිලිකා රෝහලට ගියේය.ඇය සිටි හැටි දුටු විට මගේ හිතට මහා දුකක් දැනුනි.කතා කිරීමට හැකි තත්වයක ඇය නොවීය.ඉන්පසු ඇයගේ මව පැවසු ආකාරයට ඇයගේ ගර්භාශය අසල ගෙඩි පොකුරක් හට ගෙන ඇත.සැත්කමක් සිදුකොට ඒවා ඉවත් කිරීමට සිදුවන බව ඇය පැවසීය.සැත්කමින් පසු ඇය නිවසට කැදවාගෙන විත් තිබුනි. නමුත් ඇයට සතියකට වඩා නිවසේ රැදි සිටිමට නොහැකි විය.නැවතත් වේදනාව වැඩිවී ඇයව රෝහල් ගත කෙරුණි.එහීදි කෙරුනු පරීක්ශණ වලින් හෙලිවූයේ ඇයගේ ගර්භාෂය ඇතුලතද ගෙඩි පොකුරු පිහිටා ඇති බවය.එම ගෙඩි පොකුරු ඉවත් කිරීමට නම් ඇයගේ ගර්භාෂය ඉවත් කල යුතුයයි දොස්තරවරු පැවසීය.ඇගේ ජීවිතය බේරාගත යුතු බැවින් ඇගේ දෙමවුපියන් එයට කැමති විය.සැත්කම සාර්තකව සිදුකර ඇයව නිවස කරා රැගෙන විත් තිබුනි.

මේ සිදුවීම් මෙලෙස සිදුවෙද්දි ගමේ තැන තැන කතාවක් ගොඩනැගෙමින් තිබුනි.

"පවු අසරණ කෙල්ල තාත්තගෙ වැරදි නිසා ඒ අහිංසකීට වුන දෙයක්"

ටික කලක් ගෙවෙද්දී මේ කතාවේ අගක් මුලක් මට වටහාගත හැකි විය.
ඇයගේ පියා දොස්තර කෙනෙකි.රජයේ ඉස්පිරිතාලයක රාජකාරි කලද ඔහු හොර රහසේ නීති විරෝධ් ගබ්සා මධ්‍යස්තානයක් පවත්වාගන ගොස් ඇත.ඔහු එහීදි මෙලොව එලිය දකින්නත් කලියෙන් කී දෙනෙකුගෙ ජීවිත නසන්නට ඇත්ද?දැන් හැමෝම සිතන්නේ ඔහු එසේ කල බැවින් ඇයගේ දුවට මේ ඉරණම අත් වූ බවයි.එසේ නම් ඔහුගේ කල පවු වලට කිසිලෙසවත් ඒ පවු වලට සම්බන්ද නැති ඒ අහිංසකිට වන්දි ගෙවන්න වීම සාධාරණද?

ප්‍රශ්ණ

2010-08-29T07:01:00.000-07:00

ජීවිතේ එපා වෙලා ඇත්තටම
බොරැවට බැනුම් අහන එකෙත් සීමාවක් තියෙන්න එපයි
අමාරැවෙන් අගහිගකම් මැද්දෙ
ජීවිතය ගොඩයන්න හිතුවත්
කිසිම උදවුවක් නැහැ
බැනුම් විතරයි
විච්චූරන පුරුන ලෝකෙ
ඇති හැමදේම ඉල්ලුවෙ නැත්තෙ
අත මිට හිග බව දන්නා නිසයි
ඒත් ඕනම කරන දෙයක්
මම ඉල්ලුවොත් ඒකත් වැරැද්දක්ද?
කොයිතරම් හිත හයිය වුනත්
මෙහෙම බොරැවට බැනුම් අහනකොට
හිත කඩාගන වැටෙන එක අහන්නත් දෙයක්ද?

ජීවිතයේ ලස්සනම දවස

2010-08-24T08:15:00.000-07:00

ගිම්හානයේ දවසක

ලස්සණ හැන්දැවක
ලස්සණට කරල් පීදුන
ඈත වෙල් යායක
අතීනත් පටලාගෙන
ඔබත් මමත්
ලස්සණ ආදර කතාවකට
සුභ ඇරයුම් පැතු
ජීවිතයේ ඒ
සොදුරැතම දවසට
ආදරෙයි තවමත්
මම...................

ඔයාලටත් අනිවාර්යෙන්ම තමන්ගෙ ආදරේ හම්බවුන දවස හොදට අද ඊයෙ වගේ මතක ඇති.කොච්චර සුන්දරද නේද ඒ දවස?......

මේ ගේම් එක ඔයාලත් ගහලා තියනවද "ඉගි"?

2010-08-09T07:06:00.000-07:00

මගෙ යාලුවෙක්ට වුන පොඩිම පොඩි ආතල් වැඩක් එක්කයි මම අද ආවෙ.අපේ රත්මලානෙ පංතියට එනවා තාරක කියලා යාලුවෙක් මාතලේ ඉන්දලා.මාතලේ කිවුවට ඊටත් ගොඩක් එහා.ඉතින් ඔය රත්මලානෙ පංතියේ පොඩි විවේකයක් හම්බුනාම අපි යනවා ඒකෙ canteen එකට ප්ලේන්ටියක් එහෙම බීලා එන්න.ප්ලේන්ටිය බොන ගමන් ඉතින් කට්ටිය රස කතා එහෙම කියනවා.එක දවසක තාරක අයියා කිවුව කතාවක් තමයි මේ.

තාරක අයියලගේ ගමේ ඉන්නවලු යාලුවෙක් නුවන් කියලා.තාරක අයියලගෙ ගෙදරට ගෙවල් 5,6 ක් එහායින්ලු නුවන් ඉන්නෙ.මිනිහ කම්පියුටර් එකක් එහෙම ලගදිලු ගත්තෙ.කම්පියුටර් එක ගත්ත දවසෙ ඉන්දන් ඉතින් game ගහන එකමලු වැඩේ.ඔන්න එක දවසක් උදේම නුවන් එනවලු තාරක අයියලගෙ ගෙදර.ඇවිත් මෙන්න මෙහෙම කිවුවලු

නුවන්:මචන් තාරක ඊයෙ මට හම්බුනා බන් මරු game එකක්.වෙඩි තියාගන්න එකක්.හැබැයි ටිකක් විතර අමාරුයි බන්,කොහෙන් හරි වෙඩිල්ලක් වැදිලා මැරෙනවා නෙ බන්

තාරක:කවුද බන් දුන්නෙ game එක?මටත් ගෙනත් දියන්කො

නුවන්:අල්ලපු ගෙදර පොඩි එකාගෙන් බන් ඉල්ල ගත්තෙ

තාරක:ඒක නෙමෙයි මොකක්ද game එකේ නම නුවන්?

නුවන්:"ඉගි" මචන් game එකේ නම.මම නම් හම්බුනේ පලවෙනි එක."ඉගි" දෙකයි තුනයිත්
තියනවලු බන්.ඒ දෙකත් හොයාගන්න ඕන.උඹ ඔය කොලඹ යන ගමන් පොඩ්ඩක් බලපන්කො මචං

තාරක:හරි ආයි කොලඹ යන දවසට මම බලන්නම්.ඊට කලින් මට උඹ ගාව තියන එක ගෙනත් දියන්කො

නුවන්:එල විනාඩියක් දියන් මම සුටුස් ගාලා ගෙදරට දුවලා ගෙනත් දෙන්නම්

ඔන්න නුවන් ගෙදරට දුවලා අනික් අතට එනවලු game එකත් උස්සගන.ඊට පස්සෙ තාරක අයියාගෙ අතට game CD එක දුන්න ගමන් තාරක අයියට හිනාව නවත්තගන්න බැරි වෙලා.
බැලින්නම් තාරක අයියාගෙ යාලුවා නුවන් "ඉගි ඉගි" කියලා තියෙන්නෙ "IGI" game එකට.පස්සෙ තාරක අයියා ශේප් එකේ යාලුවට වැඩේ කිවුවලු.මම හිතන්නෙ ඔයාලත් ඉගි game එක සෙල්ලම් කරලා ඇති.හොදයි නේද ඒ game එක????????

අමන දොස්තර

2010-08-08T19:00:00.000-07:00

අද මම ආවේ මගේ හිතට ගොඩාක් වැදුන සිදුවීමක් ගැන ඔයාලට කියන්න.ලඟදී දවසක මම අපේ කස්ටියගෙ පෝස්ට් කියව කියව ඉන්නකොට තමයි අපේ සිකා අයියගෙ(සිරකරුවෝද මනුෂ්‍යයෝය) මේ පෝස්ට් එක දැක්කේ(මෙහෙමත් දොස්තරලා).මේ පෝස්ට් එක කියෙව්වම මට හිතට හරිම දුකක් දැනුනෙ.ඒවගේම කියලා නිම කරන්න බැරි කේන්තියකුත් ආව.මේ පෝස්ට් එක දාපු සිකා අයියාට ගොඩක් ස්තුතියි.එයාගෙ ලිපියට ප්‍රචාරයක් දෙන්න තමයි මම මේක ලියන්නෙ.අපේ බ්ලොග් ගඩොල් සහෝදරයත් වැම්පයර් සහෝදරයත් මේ ගැන පෝස්ට් දාලා තිබ්බා.ඔවුන්ටත් මගේ ස්තුතිය!

!!!!මේ තියෙන්නෙ සිකා අයියාගෙ පෝස්ට් එක!!!!

........................................................................

මම ඊයේ බදුල්ලෙ හොස්පිටල් එකට ගියා ලෙඩෙක් බලන්න යාලුවෙක් එක්ක.
මගේ යාලුවාගේ නෑ වෙන කෙනෙක් තමා හොස්පිටල් ඇඩ්මිට් කරල තිබ්බේ.මේ දවස්වල වේගයෙන් පැතිරෙන ඩෙංගු රෝගය තමයි එයාට හැදිල තිබ්බේ.මේ දවස්වල බදුල්ල මහ රොහලට සාමන්යෙ රෝග තියෙන අය ඇතුල් කරගන්නෙත් නැහැලු.ඒ තරම් ඩෙංගු රෝගින් ඉන්නවා මේකේ.

රෝහලට ලෙඩෙක් බලන්න යනකොට ඒකෙ වැඩකරන ඕන එකාගෙනුයි එපා එකාගෙනුයි බැනුම් අහන්න වෙන එක සාමාන්යක දෙයක් වෙලානෙ දැන්.සමහරවිට ඒ ඒ අයගේ බුද්ධි මට්ටම් නිසාද දන්නෙත් නෑ.මොකද රෝහලේ වැඩ කරන ගොඩ දෙනෙක්ගේ මුඛයෙන් පිටවෙන්නේ "කොහෙද යන්නේ ඕයි,මෙහෙ එනවා ඕයි" වැනි දේවල්.

කොහොමහරි ඔයා බාධක බැද්දෙන් අපි දෙන්න වාට්ටුවට ගියා.
පෝලිමේ ඉඳල අපි වාට්ටුවට එනකොට ලෙඩ්ඩු බලල ඉවරවෙන වෙලාවත් කිට්ටුවෙලා.අපි ආවේ ගර්ල්ස් වෝඩ් එකට.ඒකේ තමයි ලෙඩා හිටියේ.

ඒ වෙලාවේ තව ගෑනු ලමයෙක් ඉස්කෝලෙ ඇඳුමින්ම ගෙනල්ල හොස්පිටල් එකේ ඇඩ්මිට් කලා.දැනගන්න ලැබුනා එයාටත් ඩෙංගු කියලා.

ඊට පස්සෙ සිද්ධවුන දෙය මටනම් බලන් ඉන්න බැරිවුනා.

ඒ වාට්ටුවේ ඉන්නව දෙමළ දොස්තර කෙනෙක්.එයා ගොඩක් සැරයි කියලා අපි බලන්න ආපු ලෙඩාත් කිව්වා.දොස්තර පොරවගේ පුටුවක වාඩිවෙලා ඉන්නවා.මම හිතන්නේ එයා තමයි වාට්ටුව භාරව ඉන්නේ.

"මෙහෙ එනවා ළමය මෙහාට" කියලා අලුතින් ආපු ළමයට අර දොස්තර කතාකලා.
ඒ ළමයා හිටපු ඇඳේ ඉඳන් දොස්තර එන්න කියපු තැනට අඩි 20කට වඩා තියෙනවා.ඊට එහා ඒ ළමයා ගොඩක් අමාරුවෙන් හිටියෙත්.එසේ මෙසේ ලෙඩක්ද හැදිල තියෙන්නේ.
.ඒ ළමය එක්ක එයාගේ අම්ම විතරයි හිටියේ.එයාගෙ අම්ම දොස්තර ළඟට ඇවිල්ල කිව්වා

"දුවට ටිකක් අමාරුයි..ඩොක්ටර්ට බැරිද එතනට යන්න" කියලා.

එච්චරයි ඒ අම්මට කියන්න උනේ.

"මොකද මෙතනට එන්න බැරි?පොඩි බබෙක් ඇයි?පිස්සු නැතුව එන්න කියනවා" කියලා මුලු වෝඩ් එකට ඇහෙන්න කෑගැහුවා.

අනේ ඉතින් අර ළමයා අම්මට බනිනව අහන් ඉන්න බැරිනිසාද දන්නෑ ඇඳෙන් බැහැලා ආවා.ඒ ළමයට අඩි දෙකක්වත් එන්න උනේ නෑ.සිහිනැතිවෙලා වැටුනා.එතන හිටපු ඇන්ටි කෙනෙක් එයාව ඉක්මනට අල්ලගත්තා.ඊට පස්සෙ තමයි නර්ස්ලත් ඇවිල්ලා ආපහු අර ළමයව ඇඳට දැම්මේ.
එතැනින් ඉවරවුනේ නැහැ.අර ඩොක්ටර් කාරයා පොර වගේ ඇඳ ලඟට ගියා.

ඊට පස්සෙ සිද්ධවුනේ අපි කවුරුවත් නොහිතපු දෙයක්...

අර දොස්තරය වෝඩ් එකේ ඔක්කොමල බලන් ඉදිද්දී අර ළමයගේ ගවුම උඩට උස්සලා යට ඇඳුමත් ගලවලා දැම්මා.ඒ ළමයගේ අම්මට ඉබේටම කෑගැහුනා.මොන තරම් පහත් වැඩක්ද ඒ යකා කලේ?? එක්කො මේ දොස්තරයා මානසික පිස්සෙක්.නැත්තම් ඩෙංගු වගේ රෝගයක් හැදිලා හොස්පිටල් ආපු කෙල්ලෙක්ගේ යට ඇඳුමත් එක්ක මොකද්ද තියෙන සම්බන්ධය..මම ඒවෙලාවේ ඩොකා ඉන්න පැත්තට ගියා.යාලුවා තමයි මාව අල්ලගත්තේ.ගියානම් මම උගේ බෙල්ල මිරිකරනවා.මට පෙනුන විදියට මේ දොස්තරයා මුලු වෝඩ් එකම බයකෙරගෙනයි ඉන්නේ..

ඒ දොස්තරය ගියාට පස්සේ ඒ වෝඩ් එකේ හිටපු ඔක්කොමල අය වගේ අර ළමයගේ ඇඳ ගාවට ගිහින් ඇඬුවා.ඔක්කොමල වගේ කිව්වේ

"අනේ අපටනම් මේ කරපු දේ බලන් ඉන්න බැරිවුනා.. ඒ තරම් පහත් වැඩක් මේක" කියලා.
ඒ ළමයට ඒ වෙනකොටත් සිහිය ඇවිත් තිබුනේ නෑ.
ඒ වෙලාවෙනම් මටත් ඇඬෙන්න ආවා ඒ ළමයගේ අම්ම අඬනවා දැකලා.

ඊට පස්සේ තවත් එකක්...

අර දොස්තරයම වෝඩ් එකේ හිටපු ආච්චි කෙනෙක්ගේ ප්රෙ ෂර් එකද මන්දා චෙක් කරනවා.ඒ ආච්චිගේ කන් ඇහෙන්නෙ නෑ මම හිතන්නේ..මොකද ඩොකා අහන හැම ප්රශ්ණෙකටම ඒ ආච්චි කලේ "ඔව්" කියපු එක විතරයි.

ඩොකා : කොච්චර කල්ද ලෙඩේ හැදිලා?
ආච්චි : ඔව්
ඩොකා : නම මොකද්ද?
ආච්චි : ඔව්
ඩොකා : කන් ඇහෙන්නෙ නැද්ද?
ආච්චි : ඔව්
ඩොකා : එහෙනම් ඔව් කිව්වේ?
ආච්චි : ඔව්

අන්තිමට අහපු ප්රශ්නේ මුලු වෝඩ් එකටම ඇහෙන්න ඩොකා ඇහුවා.

ඩොකා : වලිගයක් තියෙනවද?
ආච්චි : ඔව්

එහෙම කියලා ඩොකා මහ හයියෙන් හිනාවුනා.නර්ස්ලා කීප දෙනෙකුත් හිනාවුනා.මටනම් පොඩ්ඩක්වත් හිනාගියේ නෑ.තිබබ තරහ තවත් වැඩිවුනා විතරයි.

මට හිතුණදේ හරි වෙන්න ඕන.මේකා දොස්තර කෙනෙක් නෙවෙයි.. මානසික පිස්සෙක්.
මේ දොස්තරයට අම්මෙක් , සහෝදරයෙක් , දුවල පුතාල නැතුව ඇති.ඒකනේ මූ මෙහෙම හැසිරෙන්නේ.මුන්ටද අපි දොස්තරලා කියන්නේ??

මම වෝඩ් එකෙන් පිටවුණු ගමන්ම කලේ රෝහලේ පරිපාලණ අශයට මේක දැනුම් දීපු එක.එතකොට එතනින් කිව්වේ මාරම කතාවක්..

"ඔය ඩොක්ටර්ට ආපු පළවෙනි කම්ප්ලේන් එක ඕක නෙවෙයි.ගොඩක් පැමිණිලි තියෙනවා" කියලා.

ඉතින් එහෙනම් මොන කෙහෙම්මලකටද මූව තවත් තියන් ඉන්නේ?? කණට ගහල එලවන්නෙ නැතුව.එක්කො මේක දේශපාලණ පෙන්දෙක් වෙන්නැති...

මේවගෙ එවුන්ව තමයි ගස් බඳින්න වටින්නේ...

මෙවැනි මිනිසුන් දොස්තර නෙමේ මොකාවුනත් අපි තරයේ හෙළා දකිමු...

ප.ලි. :-

ලඟදී බදුල්ල මහ රෝහලේදී ගෑණු දොස්තර කෙනෙක් ඩෙංගු හැදිලා නැතුවුනා කියන එක අපි කවුරුත් දන්නවා.නමුත් ඒ මරණය සැක සහිතයි එනම් දොස්තර වරුන්ගේ නොසැලකිල්ල නිසා එම මරණය සිදුවූවාදැයි සෙවීමට ජනාධිපතිතුමාගේ මූලිකත්වයෙන් මේ වනවිටත් පරීක්ෂණයක් යනවා.මෙම මරණයේ ප්‍රධාන චෝදනාව එල්ලවී තිබෙන්නේ මේ දොස්තරට කියලා වැඩිදුරටත් දැනගන්න ලැබුනා..

...........................................................................

මොකද හිතෙන්නෙ මේ අමනුස්සයා ගැන.කියන්න වචන නැහැ නේද?අංක එකේ තිරිසනෙක්.මිනිස්සුන්ගෙ සල්ලි වලින් ම නේද ඔය මිනිහා දොස්තරයෙක් වුනේ.ඒවා අමතකයි.උපදිනකොටම දොස්තර උපාධිය අරගන ආව කියලා හිතාගන ඇත්තෙ.තමන්ටත් අම්ම කෙනෙක් සහෝදරියක් ඉන්නවා කියලා මේ යකාට හිතුනෙ නැද්ද දන්නෙ නැහැ.සමහර විට අම්ම කෙනෙක් සහෝදරියක් නැතුව ඇති.මොකද එහෙම හිටියා නම් ඔය වගේ පහත් නින්දිත වැඩක් කවදාවත් කරන්නෙ නැහැ.අදාල බලධාරීන්ගෙන් මේ සිද්දියට කිසිම ප්‍රතිචරයක් නොමැති වුවත් සොභාවධර්මයා ලඟදීම මේ අමනුස්සයාට දඩුවම් ලබා දෙනු නොඅනුමානයි........

බයිලා ගමුද රීමික්ස් කරලා????????

2010-07-30T08:31:00.000-07:00

කොහොමද ඉතින්?ඔන්න මම අද ආවෙ මට කනාවට ඇහුන අලුත් සින්දුවක් අරගෙන.අද දවල් මම බත් කකා ඉන්නකොට තමයි මේ සින්දුව ටීවි එකේ ගියේ.බත් කන ගමන් ටීවි බලන එක මගෙ පුරුද්දකට ගිහින්.ඒවා ගනන් ගන්න එපා. මේක බයිලා බීට් එකේ යන සින්දුවක්.ලහිරුගෙ රම්බරී සින්දුවෙන් පස්සෙ ඒවගේම බයිලා තාලෙ සින්දු ගොඩක් හැදුනනෙ.කොහොහරි යන ගමන් පදුරකට පයින් ගැහුවත් මෙන්න බයිලා සින්දු 7,8 පනිනවා එලියට.මෙලෝ රහක් නැහැ අහන්නත් බැහැ සමහර ඒවා.Trend එක බයිලා වුනා නිසා නිකන් ඔහේ ගහලා දාලා.ඒත් මේක නම් එහෙම නැහැ.BNS ලගේ අලුත් වැඩක්.මරු බීට් එකක් තියනවා.ඇත්තම කිවුවොත් නැටවෙනවා.මාරම කික් එකක් තියනවා.සින්දුවෙ පඳ පේලි ටිකත් මරු.එක එක අයගේ සින්දු වලින් පොඩි පොඩි කැලි අරන් ඒවා අමුණලා කරලා තමයි පඳ පේලි ටික ගැට ගහගෙන තියෙන්නෙ.මම හිතන්නෙ දැනටමත් ගොඩක් අය මේක අහලා ඇති.ඒත් අහපු නැති අයත් ඇති කියලා හිතලයි පෝස්ට් එක දැම්මෙ.අහපු නැති අය මේක අහලා රසවිදින්නකො.අහන් ගමන් පොඩි ඩාන්ස් එකක් දැම්මට අපි මුකුත් කියන්නෙ නැහැ

රාග තාල පටල ගත්ත-ගීත ලොවම කලඹ ගත්ත

ගමුද රීමික්ස් කරලා

එයාගෙ මස්සිනා-දැකලා මාව ඔරවලා

යාල්පානමෙන් ගෙනාව-පිච්ච මලත් පරවෙලා

යායට පායලා-පෝය දාට එක්වෙලා

වැද්දගෙ දුවව අරන්-පැනලා ඔජායේ ගියා

බයිලා ගමුද රීමික්ස් කරලා.....

මාලු වලේ කුසල්හාමි මාලු බාන්නට ගියා

ටොක්ක ඇන්න ජෝන්සීනා-දැකලා නැනේ මේ ඔයා

ජීවිතෙ මල් කියලා-කියලා කිවුවා රොක් වෙලා

ගලප්පුලිය හැදුන මල්ලි-හන්තානෙට දැන් ඔයා

බයිලා ගමුද රීමික්ස් කරලා....

සැවැන්දරී හොරෙන් බලා-රම්බරීව වෙන් කලා

රවුම් කඩේ සුපෙම්බරී-හදපානෙම පැන ගියා

අද තනියෙන්ම කියා-ප්‍රථම හාදු දෙන්න ගිහින්

කදුලු ගලා ආපු හැටියෙ-මරද වැල්ලෙ තනි වුනා

බයිලා ගමුද රීමික්ස් කරලා....

පැතුපෙමත් අරන් ඇවිත්-අයි ඩෝන්ට් නෝ වයි කියා

මල් පිට මල් කියලා එයා-ඇපල් මලක් දි ගියා

මා දෙස නෙත් නොපියා-බලන් හිටිය නන්ගිලා

සුවද තියා අද මා ලඟ අද-ඒකොන් එක්ක පැන ගියා

බයිලා ගමුද රීමික්ස් කරලා....

MP3 එක මෙතනින් ගන්න

VIDEO එක මෙතනින් ගන්න

කොලුවගෙ ඉරණම

2010-07-29T06:54:00.002-07:00

ඔන්න අද මම කියන්න යන්නෙ අහිංසක සුකුමාල කොල්ලෙක්ට වෙන්න යන අකරතැබ්බයක් ගැනයි.මේ කොලුවා හරිම අවංක නිහතමානි රටක් වටින කොලුවෙක්.මේ කොලුවට ඉන්නවා ආදරනීය ප්‍රේමවන්තියක්.මේ දෙන්නගේ ගෙවල් තිබ්බේ කිලෝ මීටර් 6,7 ක් ඇතින්.කොහොමින් කොහොමින් හරි කාලේ ගෙවෙනකොට මේ ගෑනූ ලමයගෙ ගෙදරින් මේ හුට පටේ දැනගන මේ අහින්සක කොලුවට එන්න කියනවා එයාලගේ ගෙදරට.කොලුවත් ඉතින් තියන හොදම ඇදුමත් ඇදගන ෆුල් ෆිට් එකේ මාමණ්ඩිලගේ ගෙදර යන්න පිටත් වුනා.සිංහයා වගේ ගෙදරින් එලියට බැස්සට මොකෝ ගේ ලං වෙන්න ලං වෙන්න දන හිස් දෙක මැඩලින් ගහන වේගෙ වැඩිවෙනන් ගත්තා.කොලුවට ඉහින් කනින් දාඩිය බේරෙනවා.ඒත් ඉතින් බැරිමර ගාතෙ ගියා කොලුවා ගෙදර දොර ඉස්සරහට.මෙන්න කොලුවාගෙ නැන්දම්මා ඉන්නවා ගේ දොරකොඩ පුන් කලස වගේ.කොලුවාට දැම්ම නැන්දම්මා හොද හිනාවක්.කොලුවත් ලැජ්ජාවට බිම බලාගන හිනා වුනා.

ඔන්න දැන් කොලුවා ගේ ඇතුලට ගියා.ගිහින් පුටුවක වාඩිවුනා කකුල් දෙකත් ලංකරගන අත් දෙකත් ඊට උඩින් තියාගන.විනාඩියක් දෙකක් ගියා ඔන්නා මාමන්ඩිය කැටුව කොලුවගෙ ආදරෙ එනවා හිනා වෙවී.මාමන්ඩි වාඩි වුනා කොලුවගෙ ඉස්සරහින්.මෙන්න බොලේ පටන් ගත්තේ නැතැයි සුපිරි දේශනයක්.දැන් විනාඩි 10 ක් විතර ගියා දේශනේ.අතරමැදදි පොඩි සංග්‍රහයකුත් ආවා.මොන සංග්‍රහ ආවත් මාමන්ඩි නෙමෙයි දේශනේ ඉවර කලේ,ඒ වෙලාවෙ කොලුවා හිතුවලු මාමන්ඩි ඇයි දේශපාලනේ කලේ නැත්තෙ කියලා,ඔන්න ඔක්කොම ඉවර වෙලා අන්තිමට මාමන්ඩි කියුවා කොලුවට "පුතා ඉතින් දැන් මේ සම්බන්දෙ ඔයාලගේ ගෙදරටත් ඉක්මනට කියන්න ඕන" කියලා.හුටා කොලුවට උන් හිටි තැන් අමතක වුනා.මොකද මේ කේස් එක දැන්ම ගෙදරට කිවුවොත් කොලුවගෙ කෑම සලාකෙත් කපලා දානවා 200% සුවර්.ඒත් ඉතින් මුනට මුකුත් කියන්න බැරි නිසා ඔලු බක්කා වගේ ඔලුව වනලා හා කියලා නිකන් හිටියා.

පස්සෙ දේශනේ ටික වෙලාවකින් ඉවරවුනා.පස්සෙ කොලුවා නැන්දම්මයි එයාගෙ ආදරනීය ප්‍රේමවන්තියයි එක්ක පොඩි chat එකක් දාලා කට්ට්යටම සමුදීලා හැරෙන තැපැලෙන් කොලුවා දුවලා ගෙදර ආවා මොකද කාපු බීපු තැන්වල වැඩිය ඉන්න හොද නැති නිසා .

සතියක් දෙකක් ගෙවුනා.ඔන්න ඊට පස්සෙ කොලුවගෙ ආදරනීය ප්‍රේමවන්තිය අතේ මාමන්ඩි WORNING එකක් එවලා තව සතියක් ඇතුලත මේ ගැන ගෙදරට කිවුවෙ නැත්තම් එයාලා කොලුවගෙ ගෙදරට එනවා කියලා.කොලුවට ලියුකේමියාව හැදුන වගේ ඇගේ ලේ වතුර වෙන්න පටන් ගත්තා.කොලුවා ෆුල් හින්දුස්තාන්.කර කියා ගන්න දෙයක් නැ.මොනවා උනත් ගෙදරට මේ ගැන කියන්නත් බෑ.අනේ මන්ද?ඔය ජංජාල ඔක්කොම අස්සෙ භීතිය කුතුහලය පිරි සතියක් ඉබි ගමනෙන් ගෙවිලා ගියා.මොකද කොයි වෙලේ මාමණ්ඩ්කඩා පාත් වෙයිද දන්නෙ නැනෙ.ම්හ් ආවෙ නම් නැහැ.පස්සෙ කොලුවට තෙරුනා මාමන්ඩ්ගෙ කූට උපක්‍රමයක් කියලා මේක.මගෙනුත් කිසි ප්‍රතිචාරයක් නැති නිසා සතියෙන් සතිය මට WORNING එනවා ගෙදරට එනවා කියලා.දැන් ඉතින් කොලුවව තම්බන්න බැහැ.කොලුවා නෙමෙයි එන WORNING සතේකට ගනන් ගන්න. ඒනිසා අද වෙනකොට කොලුවගේ මේ වැඩ වලට මාමණ්ඩිට හොදටම මල පැනලයි ඉන්නේ.

ඔන්න දැන් තමයි හොද ටික.මේ කොලුවා සමග පවුලේ කට්ටිය ඉන්න කුලී ගෙදරක.මම උඩදි කිවුවේ කොලුවගෙයි කොලුවගෙ ආදරනීය ප්‍රේමවන්තියගේ ගේයි තියෙන්නෙ කිලෝ මීටර් 6,7 ක් ඇතින් කියලා.දැන් කොලුවට කොලුවා ඉන්න කුලී ගෙදරින් යන්න සිද්ද වෙලා.ඉතින් කොලුවගෙ තාත්තා මේ ටිකේ ගෙවල් හොයනවා.දවස් 2,3 කට පස්සෙ කොලුවගෙ තාත්තාට ගෙයක් හම්බ වෙලා හොද.කොලුවගෙ තාත්තා අම්මත් එක්ක කතා කරනවා අලුත් ගේ ගැන.කොලුවත් ඒ පැත්තට කන දාගෙන හිටියා.ඔන්න දැන් කොලුවගෙ තාත්තා අලුත් ගේ ගැන කියනවා.ම්ම්ම්ම්ම්ම් ගේ නම් හොදයි වගේ.ගේ තියෙන්නේ කොහෙද කිවුවට පස්සෙ

තමයි කොලුවට ආයි ලියුකේමියාව හැදුනා වගේ වෙන්න ගත්තේ.මල හත්තිලවුවයි අලුත ගේ තියෙන්නේ කොලුවගෙ ආදරනීය ප්‍රේමවන්තියගේ ගෙවල් පැත්තෙලු .කොලුවා තව ටිකක් අහඟන හිටියා විස්තරේ.හත්තිලවුවට ගහපු කලාබරේ කිවුවලු, කොලුවගෙ ආදරනීය ප්‍රේමවන්තියගේ ගේ ගාවමලු විස්තරේ හැටියට. මලලසේකර,දැන් ඉතින් මකර කටට ගියා වගේනෙ.වෙස් මුනක් දාගන තමයි කොලුවට ඉන්න වෙන්නෙ ඉස්සරහට.මෙච්චර කල් කට්ට් පැනපු කොලුවට මොනවා වෙයිද?ඊලඟ සතියෙ බුරහස්පතින්දා 9.08 තියන සුභ නැකතින් අලුත් ගෙට කොලුවා යනවලු.සුභ නැකතින් අලුත් ගෙට ගියාට කොලුවට ඉස්සරහට සුභ වෙයිද?

පාසලේ විත්ති 2

2010-07-26T06:48:00.000-07:00

ඔන්න පොරොන්දු උන විදිහටම මගේ කතාවෙ ඉතුරු ටික අද මම කියන්නයි හදන්නෙ.නවත්තපු තැනින්ම පටන් ගමුකො.

ඔන්න ඉතින් ඉස්කොලෙ වැඩයි අපේ පිස්සු වැඩයි අතරේ කාලය ගෙවුනේ අපිටත් නොදැනිම.දැන්අපිටscience section ගෙදර වගෙ.ලමයි,ටීචර්ලා ඔක්කොමලා අදුනනවා.කාලෙත් එක්කම මගෙයි මගේ පිස්සු යාලුවො දෙන්නගෙයි පිස්සු වැඩත් වැඩි වුනා.මුල් කාලෙ පංතියෙ ඉස්සරහම ඉන්දපු අපි පස්සේ පාර්ලිමේන්තුවෙ පසුපෙල මන්තිරීලා වගේ පස්සෙම තිබ්බ පේලිය රජ කරන්න ගත්තා.පිස්සු කෙලිනවා තුන්දෙනා අන්තිම පේලියෙ ඉන්දලා.ඒත් පංතියේ දෙන වැඩ මිස් කලෙත් නැහැ අපි.ඒ නිසා ටීචර් ලත් එච්චර ප්‍රශ්ණයක් දැම්මේ නැහැ.

ඔන්න එක දවසක් අපි ‍අන්තිම පීරියඩ් 2 physics practicle වලට lab එකට ගියා.ඔන්න දැන් ටීචර් උගන්වනවා.ඔය අතරෙ අපේ සුප්පට(සුපුන්) රස කතාවක් මතක් වෙලා අපිට කියන්න ගත්තා(මට සුප්පා කිවුව කතාවනම් මතක නැහැ). මටයි ෂෙහාන්ටයිත් ඉතින් මොන physics ද?අපි සුප්පා ගෙ රස කතාව අහන්න ගත්තා.සුප්පත් රස කර කර කතාව කියනවා.සුප්පා කතාව කියලා ඉවර වුනා විතරයි කතාවෙ හොද කමට(අපේ සුප්පා කතා කියන්න හරි දස්සයා) අපි දෙන්නට හිනා හොදටම.කොහොම හරි අපි දෙන්නගෙ හිනාව over giya.මුලු පංතියම අපිව කලින් දැකලා නැහැ වගේ අපි දිහා බලාගන.හුටා මිස්ටත් ඇහිලා අපේ හිනාව.මිස් අපේ දිහා ඔරවගන බලාගන ඉන්නවා.වැඩේ කියන්නෙ මිස්ට නෝන්ඩි මම විතරයි.බලමුකො ඒකෙත් හැටි.ඔරවගන හිටපු මිස්ගෙ කට වැඩ කරන්න ගත්ත.

මිස්:හා හා නවත්තගත්ත නම් ඔය සිරික්කිය.හිතුවද මගෙ කන් ඇහෙන්නෙ නැහැ කියලා.පුබුදු එන්නයි කියුවෙ ඉස්සරහට.ඇවිත් වාඩිවෙන්න ඔය පුටුවකුත් ඇදගෙන ගුරු මේසෙන්.

මිස්ගෙ තිබ්බ කරුණාවන්ත කමට අපේ වැරද්දට ඔච්චරයි බැන්නෙ.පොතත් අතට ගත්ත මම මගේ පාප මිතුරන්ගෙන් ඇත්වෙලා ගුරු මේසෙට ගියා(පාප මිතුරො කියුවෙ ජොලියට).ඊට පස්සෙ මම ගුරු මේසෙ පැත්තකින් පුටුවකුත් තියාගන හොර පුසා වගෙ වැඩ ටික කලා.ඉස්කොලෙ ඉවර වෙන්න විනාඩි 10ක් විතර තියලා අප මිස් ගියා කොහෙද,මිස් පොඩි වැඩකුත් ඳීලයි ගියෙ.ඒකත් ඉවර කරපු මම කරන්න වෙන වැඩකුත් නැති නිසා වටපිට පොඩ්ඩක් බැලුවා(ඒ කාලෙ අපිට අත පය එක විදිහකට තියාගන ඉන්න බැරි ලෙඩක් තිබ්බනෙ,දැන් කියලත් මහ වෙනසක් නැහැ.)ගුරු පුටුව තිබ්බේ මගේ අතේ දුරින්.ඔන්න එතකොට තමයි පුටුව උඩ තිබ්බ හැට්ට කට්ටක් දිහාට මගේ ඇහැ ගියේ.ගත්ත ගුරු පුටුව තව ටිකක් ලඟට,කටුව අතට අරගන ඒක දිග ඇරියා,දිග ඇරලා ඒක ගුරු පුටුවෙ(ගුරු පුටුව වේවැල් නෙ)වේවැල් අතරින් යැවුවා.යවලා ඕක කර කව කව හිටියා කම්මැලි කමට.ඔන්න එතකොටම වගේ ඉස්කොලෙ අරින බෙල් එක ගැහුවා.ගත්තා පොත් ටික අතට school bus එකේ අන්තිම සීට් පේලිය අල්ලගන්න දිවුවා උසේන් බෝල්ට් වගෙ.සීට් එකත් අල්ලගත්තා,ඒ වැඩෙත් හරි.bus එකේ සින්දුවකුත් කියාගන ගියා ගෙදර.දවස ගෙවිලා ගියා.ඊලග දවසත් උදාවුනා.

7.20 ට විතර ගියා ඉස්කොලෙට.7.30 ඉස්කොලෙ පටන් ගත්තා.මුල් පිරියඩ් 2 ගෙවිලා ගියා සුපුරුදු විදිහට.ඔන්න ඊලඟ පීරියඩ් එක පටන් ගද්දි අපේ chemistry ටීචර් වෙනුවට එනවා section head.

එයාට ලමයි ආදරෙට කිවුවෙ පොඩි සීසර් කියලා(ටීචර්ලට එහෙම නම් කියන එක මම නම් අනුමත කරන්නෙ නැහැ)ඔන්න ඒ සර් ආවා පංතියට

මේ පංතියෙ ලමයි නේද ඊයෙ අන්තිම පීරියඩ් 2 physics lab එකෙ හිටියෙ?ඒ හිටපු කවුරු හරි ලොකු වැරැද්දක් කරලා තියනවා.කවුද ඊයෙ ගුරු පුටුවෙ කට්ටක් ගැහුවෙ කියලා ඇහුවා?වැරැද්ද කරපු කෙනා කැමැත්තෙන්ම නැගිටින්න කිවුවා.පංතියෙ ඔක්කොමලා මුනට මුන බලාගත්තා.මටත් වැඩෙ මීටර් වුනේ නැහැ එක පාරට.කවුරුත් මුකුත් කිවුවෙ නැහැ.ඊට පස්සෙ සර් කිවුවා වැඩේ කරපු කෙනා ඉදිරිපත් වෙනකන් පංතියට උගන්වන්නෙ නැහැ කියලා.

පස්සෙ මම කල්පනා කලා කවුද මේක කරන්න ඇත්තෙ කියලා?අප්පට සිරි දැන්නෙ මතක් වුනේ,මමනේ ඊයෙ ඕකට කටුවක් ගහලා කර කවකව හිටියෙ.(මම කටුව කර කව කව ඉන්දලා බෙල් එක ගහපු ගමන් දිවුවනෙ.මට ඒක අයින් කරන්න අමතක වුනානෙ,අද උදේ ටීවර් ඇවිත් වාඩි වෙද්දි ටීච්ර්ගෙ ඇගේ කටුව ඇනිලා.ඇනිලා කියන්නෙ හොදටම ඇනිලා.මේ දේ අත් වැරදිමකින් වුනා මිසක් හිතලා මතලා කරපු දෙයක් නෙමෙයි.මොකද අපේ ඇස් පාදන ගුරුවරයකුට මෙහෙම දෙයක් කරන්න තරම් මම අමනුස්සයෙක් නෙමෙයි)

ඊට පස්සෙ මම නැගිටලා සර්ට කිවුවා වුන වැඩේ.ඒත් සර් පිලිගත්තෙ නෑ මම කිවුව දේ.ඊට පස්සෙ මම අපේ ටීචර් ලඟට ගිහින් වුන වැඩේට සමාව ඉල්ලුවා.මම ටීච්ර්ට කිවුවා උන දේ.අපේ කරුණාවන්ත ටීචර් මම කිව්ව දේ පිලිගත්තා.ටීචර් කිවුවා මම දන්නවා පුබුදු ඒවගේ නරක ලමයෙක් නෙමෙයි කියලා.මට මාර happy.මම ආයි පාරක් ටීචර් ගෙන් සමාව ඉල්ලලා පංතියට ආවා.ඔය වැඩෙන් ප්‍රයෝජනේ ගත්ත මගේ පංතියේ අපත set එක මට card එකකුත් ගහලා "කටු මාරිස්" කියලා.අන්තිමට card එකකුත් වැටිලයි සිද්ධිය අහවර වුනෙ...............

පාසලේ විත්ති 1

2010-07-25T06:22:00.000-07:00

අද මට හිතුනා මම ඉස්කෝලෙ යන කාලේ උන පොඩි වැඩක් කියන්න.මේක උනේ මම 12 වසරට ගිය අලුත.මුල ඉන්දම පටන් ගමුකො එහෙනම් කතාව.ඔන්න ඇඟිලි ගැන ගැන හිටපු 12 වසරට මුලින්ම යන දවස උදාවුනා.පාන්දරම නැගිටල දත කට එහෙම මැදලා අලුත් ඇදුමකුත් ඇදගෙන ඉස්කෝලෙ යන්න පිටත් වුනා.පුරුදු විදිහට 138 නැඟලා නුගේගොඩින් බැහැලා ඉස්කෝලෙට ඇතුල් වුනා.

ඔන්න ටික වෙලාවකින් මම science section එක ඉස්සරහ. මේක ඇතුලට යන්න මට නිකම් මොකක්ද මොකක්ද වගේ.මේක නිකන් කලුවර ගුහාවක් වගේ.අමුතු සැර ගදකුත් එනවා

(පස්සේ තමයි දන්නේ එතනයි chemistry lab එක තියෙන්නෙ කියලා).කොහොම හරි හිතට වීරිය අරඟන මහගිරි දඹේ වගේ පඩි පෙල නඟින්න ගත්ත.මගේ පංතිය තිබ්බේ උඩම තට්ටුවෙ.පංතියට ගියාම නම් මාර සතුටක් දනුනා.මොකද මගේ අතිජාත යාලුවො 2ත්(ෂෙහාන් & සුපුන්) මගේ පංතියට වැටිලා.ඊට පස්සෙ මම ටිකක් කැරකිලා බැලුවා පොඩ්ඩක් වටපිටාව ගැන.

එතකොට තමයි දැක්කෙ අලුත්ම ටිචර්ල ටිකක් අපේ science section eke ඉන්නෙ කියලා.එක වසරේ ඉන්දල අපි ඉස්කෝලෙ හිටියට මේ ටිචර්ලව දැකලා තිබ්බෙ අතේ ඇන්ගිලි ගානටත් වඩා අඩු ගානක් තමයි.කතා කරල වත් නැහැ මේ ටිචර් කෙනෙක් එක්ක.

ඔන්න බෙල් එක එහෙම ගහලා ඉස්කෝලෙ පටන් ගත්ත.පලවෙනි දවස නිසා මාත් යාලුවො

දෙන්නත් ඉස්සරහම පේලියෙන් ඈදිගත්ත.ඔන්න එතකොටම වගේ අපේ පංතිය බාර ට්චර් ආවා.එතකොට මට පොඩි කාලේ කිවුව සින්දුවකුත් මතක් වුනා

ඇය කොන්ඩෙ දිගට වවලා හැම උදේම එනවා

පාට පාට මල් වැටිච්ච සාරි අදිනවා

ඔක්කොම ඕනේ නැනෙ.ඔයාලා ඒක දන්නවානෙ.හික් හික් හික්.කොහොමහරි පීරියඩ් 2 ගෙවිලා ගියා.අපේ පංති බාර ගුරුතුමිය නම් හරිම හොද පාටයි.ඊලඟ පීරියඩ් 2 ගෙවිලා ඉන්ටවල් ආවා.දිවුවා තුන්දෙනා එක්ක කැන්ටිමට ගිහින් හොදට බඩ කට පුරවගන ආපහු ආව පංතියට.ඊට පස්සෙ දවස ගෙවිලා ගියා නොදැනිම ෂෙහාන්ගෙයි සුපුන්ගෙයි බයිලා කතා මැද්දෙ.ඔක්කොම ටිචර්ලා හොදයි maths සර් ඇරෙන්න.පුදුම කම්මැලි.ඈනුම් ගියා සීයක් විතර.ඒ සර් තව ටිකක් වෙලා ඉගැන්නුවානම් අපි තුන්දෙනා ගෙන් කාගෙ හරි හක්කක් පනිනවා යවපු ඈනුම් වල තරමට.

ඉතින් ඔහොම සතිය දෙක ගෙවිලා ගියා ටීචර්ලගේ

සමිකරණයි අපේ බයිලා කතා මැද්දෙ.ඊට පස්සෙ දවසක තමයි හොදම වැඩේ වුනෙ.ඒ ටික

මම ඔයාලට හෙට කියන්නම්කො අදට මේ ඇතිනෙ....

අහබුවෙන් ඇසුනු දෑ

2010-07-23T10:44:00.001-07:00

කොහොමද ඉතින්?ඔන්න නිවාඩුවක් හම්බුන වෙලාවෙ පෝස්ට් දාන්න හිතුවා.

ගිය සදුදා මම රත්මලානෙ පංතියට යන්න පාන්දරින්ම කොට්ටාවෙන් නැග්ගා 255(කොට්ටාව-ගල්කිස්ස) බස් එකට.උදේට 255 බස් වල හරියට සෙනඟ.ඒත් ඉතින් කොට්ටාවෙන්ම බස් පටන් ගන්න නිසා සීට් එකක් හොයාගන්න ඒතරම් අමාරුවක් වුනේ නැහැ.මේ වල් පල් ඕන නැනේ.වැඩේට බහිමුකො.ඔන්න දැන් බස් එක යනවා පැයට කිලෝ මීටර් 5 ක 6 ක විතර වේගෙන්.එපා වෙනවා ඉතින්.ඔය යන අතරෙ බස් එකේ උඩ්න් චර බර ගාන සද්දයක් ආවා.නිකමට වගේ උඩ බැලුවා,මොකද කරුමෙට වත් වහල කඩා ගෙන වැටුනොත්.නෑ නෑ ඩ්‍රියිවර් අයියා වෑර්ලස් එක ට්යුන් කරනවා.

ඔන්න එකපාරටම සින්දුවක් ඇහෙන්න ගත්තා.කම්මැලි කමේ ඉන්දපු මාත් සින්දුවට හොදට කන දීගෙන හිටියා.අහල පුරුදු නැති සින්දුවක්.ඒත් හැබැයි මරු සින්දුව.අමුතුම කික් එකක් තියනවා.මේක මුලින් slow beat පටන් අරගන පස්සෙ මැද හරියෙදි 6-8 beat එකකට යනවා.සින්දුවේ මුල් පද 2 මතක තියාගන පංතිය ඉවර වුන ගමන් ගෙදර ඇවිත් අන්තර්ජන්ජාලෙ පොඩ්ඩක් සෝදිසි කරල බැලුවා.ඔන්න ආවා එතකොට විස්තරේ.

මේ සින්දුව කියලා තියෙන්නෙ 70 දශකයේ බයිලා කලාවේ අමතක නොවන නාමයක් සටහන් කරපු M.S ෆර්නැන්ඩො මහතායි.වාද බයිලා කලාවේ ප්‍රමුකයෙකු ලෙස මොහු නම් දරනවා.භාෂා 5 ගීත ගායනා කිරීමේ හැකියාවක් මොහුට තිබුනි.එමෙන්ම 1973 දී "Golden Lotus" සම්මානයෙන්ද පිදුම් ලැබීය.

සින්දුවෙ කියවෙන්නෙ ඈත රටකට ගොස් සිටින පෙම්වතෙකු තම සොදුරු පෙම්වතිය අමතා කරන සොදුරු වදන් පෙලකි.කොතරම් සම්පත්,යාන වාහන ආදිය තිබුනද තමාට ඇයගේ ආදරය,කරුනාව තරම් ඒවා නොවටිනා බව ඔහු පවසයි.එමෙන්ම තම ආදරවන්තිය සමඟ එකට සිටින කාලයේ ලැබු අත්දැකීම්ද මොහු මතකයට නගයි.සින්දුවේ වදන් එකින් එක කියවාගන යද්දී ඔබේ සිතටද මේ පිලිබද චිත්ත රූප මැවෙනු නොඅනුමානයි.

::::ඔබට තියන ආදරේ මම::::

ඔබට තියන ආදරේ මට කියාලා දෙන්න

ගහක තියන තල් කොල මදි ලියාල දෙන්න

ඔබෙ ලස්සන සිනහව මොහොතකට දකින්න

කුරුල්ලෙක් වෙලා හිතෙනවා ඉගිලිලා එන්න

ඔබ තනිකර දුර ගමනක් යන්ඩ හිතුවෙ නැ

ගිය ගමනක් මෙච්චර කල් ඉන්ඩ හිතුවෙ නැ

මේ ලස්සන සුර පුරයකි මට ලස්සන නැ

ඔබ එක්කලා තොටුපලෙ ඔරු පදිනවා වගෙ නැ

අහස උසට මාලිගා ඇත ඉන් අඩුවක් නැ

ගයන වයන රගන ලදුන් නොදැක හිටියෙ නැ

ගම් බද වගෙ කරත්ත නෑ වාහන අඩු නැ

ඔබ එක්කලා තොටුපලෙ ඔරු පදිනවා වගෙ නැ

ඔබට තියන ආදරේ මට කියාලා දෙන්න

ගහක තියන තල් කොල මදි ලියාල දෙන්න

හඳ දවසට අහස දිහා මම බලන්නෙ නැ

බලන්න බැරි වේදනාව ඔබ නොදන්නෙ නැ

ඒ මුණෙයි ඔබෙ මුණෙයි වැඩි වෙනසක් නැ

ඔබ එක්කලා තොටුපලෙ ඔරු පදිනවා වගෙ නැ

මගේ ගතින් මෙහෙ හිටියට හිතනම් මෙහෙ නැ

මම එනකොට ආපසු එය ඔබ මට දුන් නැ

සිරියාවිය දැකගන්නට එන දින දුර නැ

ඔබ එක්කලා තොටුපලෙ ඔරු පදිනවා වගෙ නැ

ඔබට තියෙන...../

ඔයාලට මේ සින්දුව පල්ලෙහා දාලා තියන සබැදි දෙකෙන් ලබාගන්න පුලුවන්.

Km-player පරිඝණකයේ ඉස්තාපනය කර තිබෙනම් මෙම සබැදියෙන් ගන්න

::::Click here to download::::

නැතිනම් මෙම සබැදියෙන් ගන්න.

::::Click here to download::::

එදා මෙදා තුර

2010-07-11T18:20:00.000-07:00

එදා මෙදා තුර කදුලට විවරවු

දෑස් පියන්පත් කවුලු වසා...

ළයේ ගලා ගිය සෙනේහයේ සුව

සිනා පිරෑ රතු දෙතොල් පියා...

මිළාන වී ගිය රෝස කුසුම් පෙති..

කම්මුල් සුදු මැළි පා‍ට පොවා..

දෑත ළයේ බැදි අවසන් ගමනද

සොදුරිය මට නොකියාම ගියා..

දෑස් කවුළුපත් පලා කදුලු කැට..

වෑහෙද්දී ම‍ගෙ දෑස් අගින්..

කාත් කවුරැවත් වෙතත් හිතයි මට..

පාත් වෙන්න ඔය මුවට උඩින්..

ඈත්ව යන්නට..සමුගෙන කවුරැත්..

ඔබෙ මුව දොවතත් සුවඳ පැනින්..

මාත් මගේ හිතටත් ඔබ සුවඳයි..

ඈත් නොවේමයි ඒ සුවඳින්..

ඊයේ ඉපදී..අද මිය යන්නට පෙරැම් පුරාගෙන උපන් ළයේ..

හීයේ වේගෙන් අහස උසට බැඳි ආදර ලෝකය හෙටත් තියේ..

ඒත් ඉතින් දැන් සොඳුරියෙ ඔබ නැත..

ඇයි මේ ලොව මා තනිව ගියේ..

ආයේ දවසක එක හිත් ඇත්තන්..

වී අපි ඉපදෙමු එකට ප්‍රියේ..

මේ ගීතය මම ‍ගොඩක් ආස ගීතයක්.ඒ නිසා මම ඒක ඔයාලා

එක්ක ‍‍බෙදා ගන්න අදහස් කලා.සනත් නන්දසිරි මහත්මානන්

විසින් ගායනය කරන ලද මේ ගීතය අහන විට ම‍ගේ ඇහට නම්

කඳුලක් එකතු වුනා.ඔයාලටත් මේ හැගීම දැනෙන්න ඇති.

තමාගේ පෙම්වතිය මියගිය ප්‍රේමවන්තයකුගේ ශෝචනීය හැගීම

මෙම ගීතයෙන් ඉතාමත් දුක්බර ලෙස ප්‍රකාෂ කෙරෙනවා.

නව රැල්ලේ ඝෝෂාකාරී ගීතයකට වඩා මේ ගීතය කොතරම්

අඟනේද?

::::ගීතය මෙතනින් ලබාගන්න::::

මිතුදම්

2010-07-10T12:48:00.000-07:00

මතකයන් සදාකල් පවතී කිසිදා මිය නොයයි

සැබෑ මිතුරන්ද එසේමය කිසිදා වෙන් නොවේ

මිතුරන් දියමන්ති මෙන් දුර්ලභය

ව්‍යාජ මිතුරන් දුහුවිලි වැනිය

හැම තැනම විසිර පවතී

මිතුදම මිලට ගැනීමට හෝ විකිනීමට නොහැකිය

එය අප සතුව ඇති අමිල සම්පතකි

බොහෝ දෙනා අපගේ ජිවිතය තුලට විත් එහි සැරිසරා පිටව යයි

නමුත් සැබෑ මිතුරන් ඔබේ හදවතට පැමිණ

ඔබගේ ආත්මය සමඟ වෙලී යයි

ජීවිතය

2010-07-09T09:19:00.000-07:00

ජීවිතය යනු වචනයකි

එහි නියම අර්ථය අවබෝධ වන තෙක්

එය හිස් වචනයකි

අර්ථ රහිතය.......

නමුත් සත්‍ය වශයෙන්ම

ජීවිතය හදුනා ගත් දින

එයට භාෂාව තුල

වචනයක් සොයා ගත

නොහැකිය.........

එබැවින්ම

සොයා ගත යුත්තේ

කිසිවක් නොව

ජීවිතයම පමණි...

සැබැ ජීවිතය

කටුක නැත

නිම් හිම් යන ප්‍රීතියක්ද නැත

ජීවිතය සරලය

නම්‍යශීලිය

එමෙන්ම සැනසිලිදායකය

පරිණාමය

2010-07-09T00:59:00.001-07:00

මගේ කලින් තිබ්බ blog එක ඔයාලට මතක ඇතිනෙ.pubudulive කියලා.ඒක පරිගණක තාක්ෂණය පිලිබද

ලියවුන blog එකක්නෙ.එත් ඉතින් තිබ්බ වැඩත් එක්ක ඒක දිගටම කරගෙන යන්න බැරි වුනා.ඒ ගැන මම

ඔයාලගෙන් සමාව ඉල්ලනවා.

වැඩ කරගෙන කරගෙන යද්දි හිත ටිකෙන් ටික අවුල් වෙන්න ගන්නවා.ඔයාලටත් අනන්තවත් එහෙම වෙලා ඇති.ඒක නිසා වැඩ වැඩි වෙලා හිත අවුල් උනාම ඒක මග ඇරවගන්න blog එක පාවිචිචි කරන්න මට හිතුනා.ඉතින් pubudulive අන්තිමට සිත් මල් යාය උනා.

මගේ හිතට දැනුන සිදුවීම්,මගේ හිතට හැගුන අදහස්,හිතට කාවැදුන සින්දු වගේ දේවල් ගැන ලියන්න මම blog එක පාවිචිචී කරන්න හිතුවා.ඒ අතරතුර අලුත් තාක්ෂණික තොරතුරු ලැබුනොත් එවත් post කරන්නම්.මම හිතනවා ඔයාලා මේ වෙනසට කැමති වෙයි කියලා.